Ko Sing
畢業於明愛白英奇設計學院
從事插畫3年
喜愛用黑白色、密集線條，來繪畫的Ko Sing，作品大多數以黑色幽默手法，畫出自己內心想建立的世界。如看過他早年前推出的黑白漫畫《富中作樂》，應該會被他風格強烈的畫風所吸引。「其實讀緊設計嗰時已經有開畫插畫，但擁有首本自己嘅作品，應該要講番4年前，當時由新鴻基地產同三聯書局合辦，舉行嘅第3屆年輕作家創作比賽中出咗線，推出咗首本《富中作樂》嘅黑白漫畫，記錄咗我前十幾年嘅生活點滴，咁後期仲同埋小克、阿德成班artist，為紀念《土製香港》10周年，一齊推出咗本畫集去記念，成個過程對我嚟講，的確攞咗唔少經驗。而大約到前年，開始加入GUMGUMGUM大本營，負責畫啲平面設計，幫公司舖頭做吓宣傳，咁當然有老闆樹文人面廣之下認識到Michael Lau，亦因劉生一句叫我不如搞番個畫展，話我畫嘢都幾特別，幾有自己風格，咁我當時就膽粗粗開始諗點實行，最後就揀咗喺中環PMQ開第一個小型畫展，為咗呢次仲特別出咗本畫集《PROLOGUE》。內容以周杰倫一首歌《威廉古堡》做主題，畫咗其中7個歌詞裏面嘅角色，加咗我好鍾意嘅添布頓元素，所以大家睇落都會話有啲似愛登士家庭入面啲人物，而自己又好鍾意用梵高嘅密集線畫畫，但平時我會拎身邊嘅事同物做靈感，畫一啲你可能覺得好無聊嘅創作，呢個就係我嘅嗜好作風。不過同時間眼見現今插畫家，好難以單一方向生存，所以我嚟緊新一年會計劃吓，打算出屬於自己嘅figure，雖然十劃都未有一撇，但都好希望可以咩都試吓，將自己嘅平面角色，化身成立體figure。」
