多得DIESEL timeframes邀請，我先可以於零下13度出席位於首爾的品牌派對「WATCH MY #DIESELWATCH」，雖然真係凍到甩肺，但可以第一次近距離見到當紅男團INFINITE，同佢哋分享時裝潮流以及Kpop文化，而場內又有好多型男model同blogger，甚至連工作人員都高大靚仔，個人當堂暖晒，let’s watch our trip！
無限可能
DIESEL的手錶貫徹了品牌在服裝設計方面的精神，以大膽創新為基本主題，我覺得甚至是帶點粗獷佻皮，不論男女的DIESEL watch都配以大錶面，再加上某幾個加大碼數字，為手錶融入時尚味道。今次他們請來韓國7人男團INFINITE出席是次活動，就是看中他們跟品牌的理念相同，因為本身「INFINITE」這個團名，就是希望他們有無限的可能性，要別樹一格，不局限於潮流之中，「其實今天韓國的時尚流行世界，我覺得也是因為我們的音樂、服裝等等，每天都在不停創新，每天都有新鮮感帶給大家。」INFINITE整個團最喜歡的就是黑色，因為容易配襯，其實他們私底下比較懶，出街時只要穿一身黑就一定冇死。
2月回歸
韓國時裝在INFINITE心目中雖然有無限新鮮感，但其實他們也強調韓裝一直沒有離開傳統：舒服，「你有看過古裝韓劇吧？古時韓國人的衣著都是以舒服為主。」所以INFINITE最終以「舒服、好睇」兩個形容詞去總括今天流行的韓國fashion。通常男仔出街都冇咩配飾，但身為偶像點都唔可以太隨便嘅，INFINITE就推介大家可以拎個clutch或者背囊，「就算冇嘢袋都要拎，fashion嚟㗎嘛！哈哈。」另外耳環都是不錯的選擇，潮要潮在細節之中，而當然一隻好的手錶也是他們的重點介紹啦，個個都搶住話自己手上隻DIESEL錶真係日日都要戴，好鬼識做呀！講到手錶自然會提及時間，原來兩個月後即2015年2月，INFINITE將會回歸，另外他們的子團INFINITE H，還有隊員聖圭的solo專輯也正在籌備，「明年會好忙，還要應付日本巡迴演唱會呢。」
手機任影
回到主場始終唔同啲，今次INFINITE在會場內不只接受訪問，更有大約半小時的mini show，唱了大約5至6首歌，包括〈BTD（Before The Dawn）〉、〈Back〉、〈Destiny〉等等，他們在台上演出時是超級親民！因為今次獲邀入場的觀眾大約有一千人左右，除了model及blogger亦有不少fans，INFINITE表演時女觀眾當然逼晒去台前，有不少人更高舉自己的手機影相，聖圭同L一時興起，拎走fans的手機自拍，於是台下高舉手機的情況更加激烈，其實我都想舉埋一份但無奈生得太矮，離台太遠結果失敗咗。之後Hoya及東雨等又拎自己部手機出來影fans盛況，一時之間台上有十幾部手機，INFINITE同fans們都影得好開心，唔知佢哋有冇影到我呢。
Party time@Club Vanguard
Club Vanguard位於江南地區，是著名的clubbing勝地，今年5月Secret的成員全孝盛也曾在此舉行solo專輯《TOP SECRET》發布會，音響超勁，震到爆肺。開騷前做訪問，香港時裝blogger no7係受邀請之列，交流完時裝心得同INFINITE整張合照先。
WSI@韓國最大商場Lotte World Mall
今次個trip仲包括參觀DIESEL在韓國的店舖WSI（Watch Style Insider的簡稱），這間WSI位於蠶室新起的霸氣商場Lotte World Mall，商場內有國際著名品牌又有韓國本土設計服飾，更有水族館（可惜我去時未開），而商場上仲起緊嘅LOTTE Tower完工後會有123層，包括酒店、住宅同辨公室，唔知頂樓會唔會有觀景台呢。其實香港都一樣有WSI，除了有手錶出售之外亦設有錶帶調較服務，總之你隻DIESEL錶有咩事拎去WSI，佢哋會盡力幫你搞掂。
Text…iris
Photo…Fung & DIESEL
