1913年於美國西雅圖創立、擁有110年歷史嘅食品 / 飲料容器品牌Stanley，因為推出40盎司保溫杯Quencher系列由2019年銷售額7,000萬美元暴升突破至2023年7.5億美元！

以往憑Hammertone綠色產品而揚名嘅Stanley，從2016年開始不斷釋出新配色嘅Quencher已成為世界上最受歡迎嘅水樽之一，因為吸引咗Stanley於第一個百年裡並沒有花太多時間迎合嘅顧客群：女性，深受護士、教師和名人嘅喜愛，從而大大提高Stanley嘅銷量！

Quencher配有方便攜帶嘅手柄，以及可滑入汽車杯架嘅錐形設計，推出市場最初幾年，並沒有產生太大嘅影響，銷售量非常平淡，以至於2019年Stanley甚至停止產品補貨和行銷。
不過2020年Terence Reilly成為Stanley新任總裁後，立即作出戲劇性轉變，Terence曾於CROCS工作7年，喺佢領導下，將橡膠Clogs變成市場上最熱門鞋款之一；當Terence加入Stanley後，喺公司內部展開一次聆聽之旅，聽取員工嘅意見。一名員工提到猶他州一群女士經營一個名為「The Buy Guide購買指南」嘅Blog。創辦人之一Ashlee LeSueur於2017年喺Bed、Bath and Beyond入手佢嘅第一款Quencher，深深愛上，作為禮物送俾朋友之餘，更向「The Buy Guide」Followers推薦。

2019年，Stanley停止Quencher產品補貨，Ashlee試圖向Stanley表示希望繼續生產，但因為銷售數據唔係太好，於是Stanley向佢作出一個提議：進行批發訂單，直接向佢嘅「The Buy Guide」受眾支持者出售Quencher。為咗實現呢一個訂單目標，Ashlee /「The Buy Guide」動用咗企業帳戶每一分錢，再加上一啲個人資金，好似簽署抵押貸款咁，好大風險入咗5,000個Quencher！不過呢批Quencher喺幾日內被搶購一空，完售！其後，Stanley新總裁Terence上任，視「The Buy Guide」為合作夥伴，聯袂製作出令人興奮嘅新配色如沙漠鼠尾草和奶油色，共同創造出Quencher現象！

Quencher銷量愈來愈好，甚至取代標誌性Stanley樽，成為品牌2020年最暢銷產品，長期佔據No.1位置，隨著每一種新顏色推出，銷量持續增長。Stanley收入從2019年7,300萬美元躍升至2020年9,400萬美元，2021年增長一倍多，達到1.94億美元。2022年，Stanley釋出重新設計嘅Quencher型號，採用流線型設計以及一系列嶄新限定聯名顏色版本。收入再次翻倍，達到4.02億美元！

作為實用品（工作 / 運動過程中保持水分）之餘，更成為Viral時尚配飾，Target入面瘋搶情人節別注版，甚至成為收藏家嘅Collectors' item系列，於StockX炒賣中！

資料來源：CNBC